Korneyl katirsan Dowladda Fedaraalka ayaa wax laga xumaado ku tilmaamay weerarkii shalay ka dhacay Masaajid Cali Guduud, isagoo ciidanka ku haray furimaha Sh-dhexe ugu baaqay iney sida ugu dhaqsiyaha badan ku faaarujiyaan goobahaaas.
Tan iyo wixii ka dambeeyay weerarkii ay shalay ciidamada Xarakada Mujaahidiinta Al-Shabaab kula wareegeen magaalada Masaajid Cali Guduud ee gobalka Sh-dhexe, ayaa waxaa isa soo taraya qeylo dhaanta kasoo yeereysa xubnaha katirsan Dowladda Fedaraalka ee ku aaddan weerarkaas.
Korneyl Khaliif Idiris Cusmaan oo katirsan Dowladda Fedaraalka, ayaa waxa uu ka hadlay weerarkii ay ciidamada Xarakada Mujaahidiinta Al-Shabaab kula wareegeen Masaajid Cali Guduud.
Waxa uu tilmaamay in halgaasi ay ku sugnaayeen ciidamo badan ee Dowladda Fedaraalka, waxa socdana uusan dagaal aheyne balse ay tahay arrin lagu baabi’inayo ciidamada sida uu hadalka u dhigay, isagoo soo hadal qaaday maxaabiista lagu qabtay dagaalka.
Waxa uu ku taliyay in ciidanka kasoo duulay qaar kamid ah goballada dalka ee ku sugan furimaha Sh-dhexe ay sida ugu dhaqsiyaha badan uga soo baxaan halkaas, haddii aysan yeelinna ay ku dhici doonto wax kamid ah tii ku dhacday ciidankii ku sugnaa Masaajid Cali Guduud.
