Hay’ada UNICEF ayaa ka digtay xaalada soo foodsartay caruur gaaraysa ku dhawaad 1 Milyan oo ku xayiran dagaallada ka socda agagaarka magaalooyinka go’adoonsan ee ku yaalla gobolka Darfur ee dalka Suudaan, iyada oo ku tilmaantay in ay ku nool yihiin macluul daran iyo nafaqo-xumo baahsan.
Taqriir ay soo saartay Hay’adan ayaa dhamaadkiisa lagu xusay in 825 kun oo caruur ah ay ku xayiran yihiin masiibada sii kordheysa ee ka taagan magaalada Al-Fasher iyo nawaaxigeeda, taas oo keentay inay dad badan iskaga qaxaan guryihii ay daganaayeen.
Carruurtan ayaa intooda badan ku nool magaalada Al-Fasheer, hase ahaatee dhanka kale waxaa jira ku dhawaad 750 kun oo caruur ah oo ka barakacay magaaladan, kuwaas oo ku nool xerada ay deriska yihiin ee Zamzam.
Hay’ada UNICEF ayaa sheegtay, in dhammaan waddooyinka gala magaaladan ay xiran yihiin, taas oo adkaynaysa in la gaarsiiyo gargaar bani’aadantinimo, waxayna horseeday in uu gobalku galo xaalad hubanti la’aan ah oo ka haysata dhanka agabyada aas-aasiga u ah nolosha, sida yaraanta biyaha, cuntada iyo daawada.
Hay’addu waxay sidoo kale cambaaraysay, kor u kaca xadgudubyada halista ah ee ka dhanka ah xuquuqda caruurta ee ka jira gobalka Darfur tan iyo bilowgii sanadkan 2025-ka, waxayna xaqiijisay in 110 kiis oo xadgudubyo halis ah lagasoo diwaan galiyay gobalkan oo kaliya, taas oo ay ku dhinteen in ka badan 70 carruur ah saddex bilood gudahood.
Sheldon Yate oo kamid wakiillada waxa loogu yeero qaramada medoobey ayaa yiri “Tirooyinkani waxay ka tarjumayaan kiisas la xaqiijiyay oo kaliya, khasaaraha dhabta ah waxaa la filayaa inuu intaas ka badan yahay, dhimashadu waxay khatar joogto ah ku tahay carruurta, taasina waxaa sabab u ah dagaallada ku hareeraysan ama burburka adeegyada muhiimka ah ee ay u baahan yihiin si ay u noolaadaan,”.
