Axmed Mowlaanaa waa khabiir ka faallooda arimaha amniga wadamada caalamka Islamaka, wuxuu tilmaamayaa in haddii ciidamada Shisheeyaha ka baxaan Soomaaliya aaney sii jiri karin Dowladda Federaalka.
” La wareegitaankii Xarakada Taliban ee talada dalka Afqaanistaan iyo sidoo kale guushii hay’adda Taxriiru Shaam iyo kooxihii la socday ay ka gaareen Suuriya oo ay gebi ahaanba rideen nidaamkii Al-Asad, waxay rajo gelineysaa Xarakada Al-Shabaab, oo ku fakareysa in tusaalooyinkaas oo kale ay ka fuliso Soomaaliya, oo ay mar labaad la wareegi karto maaalada caasimadda ah ee Muqdiso” ayuu yiri Axmed Mowlaanaa.
Isagoo hadalkiisa sii wata wuxuu intaa sii raaciyay “Waxaa jiray masuul katirsan Dowladda Federaalka oo aan kula kulmay shir aan kawada qeybgalnay, waxaan weydiiyay haddii ay Soomaaliya ka baxaan ciidamada Shisheeyaha masii jiri kartaa dowladda? wuxuu igu yiri, maya, haddii ciidamada Ajanbiga ka baxaan Soomaaliya, waxay Al-Shabaab si fudud ula wareegayaan magaalada caasimadda ah ee Muqdisho”.
Ma ahan markii ugu horeysay oo falanqeeyayaasha amniga ay tilmaamaan taagdarida Dowladda Federaalka, waxaana soo xoogeysanaya aragtida tilmaameysa in Al-Shabaab ay suurogal tahay iney la wareegaan Muqdisho.
