Waxaa habeenkii xalay magaalada caasimadda ah ee Muqdisho lagu xiray siyaasi kamid ah mucaaradka Dowladda Federaalka, kaasoo lagu magacaabo Cabdiraxmaan Saleebaan, ahna gudoomiyaha xisbi siyaasadeed loogu magacdaray Shacabka.
Ciidamo katirsan kuwa Sirdoonka Dowladda Federaalka ayaa gacanta ku dhigay Cabdiraxmaan Saleebaan xilli uu ku sugnaa hoyga uu ka deganyahay magaalada Muqdisho, waxaana ay ula kaceen jiho aan illaa iyo hadda si rasmi ah loo xaqiijin.
Ninkan ay Dowladda Federaalka xirtay ayaa waayadii u dambeeyay wuxuu bixinayay waraysiyo siyaasadeed, oo uu kaga hadlayo xaaladda Dowladda Federaalka mareyso, isagoo tilmaamayay fashilka Xasan Sheekh Maxamuud iyo inaaney suurogal ahayn doorasho qof iyo cod ah.
Saacado kahor inta aan la xirin wuxuu waraysi uu siiyay mid kamid ah warbaahinta magaalada Muqdisho ku sheegay, in dagaalka lagu soo jabay, Dowladda Federaalkana ay waqtigan difaac kaga jirto Afgooye iyo meel u dhexeysa Balcad iyo Muqdisho, ciidankii Dowladda Federaalkana ay gebi ahaanba burbureen, waxaana loo badinayaa in Dowladda Federaalku u adkeysan weysay wareysigan oo ay bulsho badan ka falceliyeen.
Bayaanaat kasoo kala baxay xisbiyada siyaasadeed ee ay kala hogaamiyaan Shariif Sheekh Axmed iyo Cabdiraxmaan Cabdi Shakuur ayaa si kulul, waxaa loogu weeraray tallaabada lagu xiray siyaasigan, iyagoona ugu baaqay Dowladda Federaalka iney si dhaqsi ah usii deyso Cabdiraxmaan Saleebaan.
War kasoo baxay taliska booliiska maamulka gobolka Banaadir ee Dowladda Federaalka, ayaa lagu sheegay iney soo xireen Cabdiraxmaan Saleebaan, kaasoo ay ku eedeeyeen inuu ku kacay falal ka dhan ah amniga.
