Maalintii shalay waxaa magaalada Tuunis eee caasimadda u ah dalka Tuunis ka dhacay, dil iyo dhaawac ay geysteen ciidamada Booliska wadankaasi.
Ruux ugu talagalay inuu nafta is dhaafiyo islamarkaana dab isku shiday, ayaa isaga oo gubanaya wuxuu isku dayay inuu galo kaniisad Yahuuddu leedahay oo ku taalla halkaasi, hase ahaatee waxaa ka hor istaagay ciidamo Boolis ah oo ilaaliyo ka hayay.
Ruuxii gubanayay ayaa inta uu ka weecday kaniisadda wuxuu toos ah u abbaaray mid kamid ah ciidanka Booliska ee goobta ku sugnaa, isaga oo gaarsiiyay dhaawac uu sababay dabka isaga ka baxayay, kaasoo ugu dambeyntii kallifay in istbitaal loola cararo.
Intii u uku gudajiray ruux naftiisa gubay weerarka ka dhanka ah askariga Booliska ee uu dhaawacay, ayaa waxaa isagana rasaas ku furay askari kale, halkaasi ayuuna ku dhintay, iyadoo isla rasaastaasi ay dhaawacday qof kale oo goobta iska marayay.
Wasaaradda arrimaha gudaha dowladda Tuunis oo ka hadashay dhacdadan ayaa sheegtay in qofka gubanayay ee Booliska weeraray uu qabay cudurro nafsi ah, taasina ay keentay inuu naftiisa gubo.
Muuqaal ku saabsan dhacdadan oo lagu faafiyay baraha bulshada ayaa muujinaya, ninka dhintay oo ku gubanaya waddo aan ka fogeyn kaniisadda, iyo rasaas dhacaysa.
