Ciidamada xukuumadda Suudaan iyo kooxda RSF ayaa wali ku dagaallamaya magaalooyin katirsan dalkaasi, iyadoo malleeshiyada Ad-Dacmu As-Sariic marba marka ka dambeysa lasii wiiqayo awoodooda.
Weeraro udhaxeeyay labada garab ee iska soo hor jeedaa ayaa ka dhacay magaalooyinka Al-Faashir iyo Al-Abyadh oo dhamaatooda ah xarumo goboleedyo.
Haddii aan ku hormarno magaalada Al-Faashir ee gobolka Daar-Fuur waxaa ka dhacay, weeraro madaafiic ah oo ay is dhaafsadeen askarta Suudaan iyo kooxda RSF, ciidanka Suudaan ayaana dhankooda sheegtay iney khasaare hantiyeed iyo mid nafeedba ugeysteen malleeshiyadan.
Dhanka kale waxay qireen ciidanka Suudaan, in RSF ay kusoo weerareen koox diyaarado nooca aan duuliyaha lahayn ah, kuwaasoo ay sheegeen ineysan wax khasaare ah ugeyssan sida ay hadalka udhigeen, mana helin ilo ka madax banaan oo ka qiijiya sheegashadooda.
Dhinaca kale dagaal fool ka fool ah ayaa labadan garab ku dhexmaray magaalada Al-Abyadh ee dhacda bartamaha Suudaan.
