Muuqaal lagu baahiyay baaha bulshada ayaa waxaa kasoo muuqanaya haweeney u dhalatay dalka Jarmalka oo sheegtay in afduub loogu heysto Soomaaliya, iyadoo ka deyrisay xaaladda amaan ee Soomaaliya, dalbateyna in laga shaqeeyo sidii looga sii deyn lahaa gacanta ay ku jirto.
Haweeneydan ayaa sheegtay in todobo sano kahor laga afduubtay magaalada Muqdisho ee caasimadda Soomaaliya, iyadoo u shaqeyneysay hay’adda Saliibka Cas ee ICRC, waxaana ay farriin u dirtay dowladda Jarmalka iyo muwaadiniinta dalkaas u dhalatay.
” Magaceygu waa Sonja Nientiet, waxaan kasoo jeedaa magaalada Hamm ee dalka Jarmalka, waxaa bishii May sanadkii 2018-ka la iga qabtay magaalada Muqdishoo anigoo uu shaqeynaya hay’adda Saliibka Cas, marka hadda todobo sano ayaan ku xiranahay Soomaaliya, sidaad la socotaan xaaladda Soomaaliya s dhaqsi ah ayay isku bedeleysaa, todobaad kahor kolonyo u la socday madaxweyne Xasan Sheekh Maxamuud ayaa la beegsaday, wuxuuna ka badbaaday isku day dil, safaaradda Maraykanka ee Soomaaliyana waxay soo saartay digniin ku socota muwaadiniinteeda oo looga hadlayo khatarta Soomaaliya, sidaasoo ay tahay hadana majrito cid ka hadleysa duruufaha la heystayaasha sideyda oo kale.
Xaaladeyda caafimaad way kasii dareysaa maalinba maalinta ka dambeysa, aad ayaana uga walaacsanahay badqabka nolosheyda, marka fariinteydan waxay ku socotaa dowladda Jarmalka, muwaadiiniinteyda iyo ehelkeyga, waxaan idin ka codsanayaa inaad qaadaan tallaabo dabacsan oo suurto gelineeysa sii deynteyda”. ayay tiri.
Waa markii ugu horeysay oo wax war ah laga helo haweeneydan u dhalatay dalka Jarmalka, taasoo warbaahinta dalkeeda horaan u tabiyeen in lagu dilay Soomaaliya, waxaana muuqata in warkaasi baal marsanaa xaqiiqada, islamarkaana weli nooshahay.
