Warbaahinta gudaha dalka Itoobiya ayaa baahisay maalintii shalay oo Sabti ahayd, in dowladda Itoobiya ay billowday hirgelinta barnaamij u gaar ah malleeshiyaadka Tigreega, kaasoo qorshaha uu yahay in dhaqan celin loogu sameeyo ciidamadan, dibna loogu daro ciidamada Federaalka Itoobiya.
Warbaahinta Fana ee ay leedahay dowladda Itoobiya ayaa baahisay warbixin ku saabsan mashruucan iyo waxa uu hiigsanayo, iyadoona tilmaamtay in barnaamijka laga hirgeliyay magaalada Maqalle ee caasimadda gobolka Tigrey, ujeedkuna yahay in ciidamadii jabhadda TPLF dib u habeyn loogu sameeyo, ciidamada dowladda Itoobiyana looga mid dhigo.
Munaasabadda lagu daah furayay mashruuca waxaa kasoo qeybgalay masuuliyiin katirsan dowladda Itoobiya iyo waxa loogu yeero Beesha Caalamka, dadka goobjooga ahaana waxaa kamid ah wasiirka arimaha dibadda Itoobiya Gedion Timotheos, madaxweynaha ismaamulka Tigreega iyo xubno ka socday Midowga Afrika iyo Midowga Yurub.
Askarta loo diiwaan geliyay iney ka faa’ideystaan mashruucan ayaa la sheegay in marka loo sameyn doono baaritaanno caafimaad, kadibna ay qaadan doonaan casharo kala duwan oo looga dhaadhicinayo iney daacad u ahaadaan dowladda dhexe ee Itoobiya, iyadoo ugu dambeynna qaadan doonaan tababaro milliteri.
Kooxda TPLF ee Tigreega ayaanan weli si buuxda hubka u dhigin, waxaana jira malleeshiyaad kooxda katirsan oo saldhigyo ku leh dhulka buuraleyda, mar welibana waxay saraakiisha kooxdan ee loo awood sheegtay tilmaamaan iney dagaal billaabi doonaan, haddii aaney dowladda dhexe ee Itoobiya ka helin xuquuqda ay leeyihiin, sida ay hadalka u dhigeen.
