Xogo dheeraad ah ayaa laga helayaa shil gaari oo saacadihii lasoo dhaafay ka dhacay gudaha dalka Itoobiya, kaas oo dhaliyay khasaare kala duwan oo isugu jira dhimasho iyo dhaawac.
Shilkaan ayaa waxa uu yimid kadib markii gaari Bas ah oo siday dad rakaab ah uu ku rogmaday, deegaan dhaca woqooyiga mandiqadda Wallo oo katirsan gobalka Amxaarada ee dalka Itoobiya.
In ka badan 25 ruux oo Itoobiyaan ah ayaa la xaqiijiyay iney ku geeriyoodeen shilkaan gaari ee ka dhacay gobalka Amxaarada, halka ay ku dhaawacmeen tiro kale kuwaas oo la dhigay xarumaha caafimaadka.
Getachew Arage oo ah Taliye Ku Xigeenka Xafiiska Booliska ee deegaanka uu shilkaan ka dhacay ayaa saxaafadda u sheegay, in gaariga Baska ah oo rakaab siday uu kasoo baxay magaalada Kurba kuna sii jeeday magaalada Dessie ee gobalka Amxaarada, balse inta uusan haalkaasi gaarin uu shil galay.
“25 Ruux ayaa ku dhimatay shilkaan, halka ay dhaawacyo culus kasoo gaareen 14 kale, iyadoo 15 ruuxna ay qabaan dhaawacyo fudud” ayuu yiri taliye ku xigeenkaan oo sii hadlayay.
Isla xilligaas waxaa shil kale uu ka dhacay woqooyiga Shewa ee dalka Itoobiya, kaas oo sababay dhimashada 2 ruux.
Dhacdooyinkaan ayaa kusoo aadaya iyadoo wax ka yar bil shil ka dhacay gobalka Sidama ee dalka Itoobiya ay ku dhinteen 71 ruux oo u socday xaflad aroos, kuwaas oo uu la rogmaday gaari ay saarnaayeen.
