Iyadoo maalintii shalay si qarsoodi ah warbaahinta loogu soo dusiyay warqad uu qoray Xasan Sheekh Maxamuud oo ku socota madaxweynaha Maraykanka Donald Trump, taasoo uu ku sheegay inuu diyaar u yahay in qeyb kamid ah Soomaaliya ku wareejiyo Maraykanka, ayaa waxaa arintaasi si kulul uga hadlay maamulka labaxay Soomaaliland.
Warqadda uu Xasan Sheekh u diray Trump waxa ku qornaa inuu diyaar u yahay inuu Maraykanka siiyo dekadaha Berbera iyo Boosaaso, oo ay ka kala arimiyaan maamullada labaxay Puntland iyo Somaliland, waxaana warqadda oo ku qoran luuqadda Englishka loo diray Aqalka cad ee Maraykanka.
Wasiirka arimaha dibadda maamulka labaxay Soomaaliland ninka lagu magacaabo Cabdiraxmaan Daahir Aadn ayaa si kulul uga horyimid warka Xasan Sheekh, qoraal uu soo dhigay baraha bulshada ayuu ku sheegay, in tallaabadani ay muujineyso fashilka iyo xaaladda quusta ah ee ay wajaheyso Dowladda Federaalka.
” Kani waa isku day quus ah iyo marin habaabin ay isku dayayso Dowladda Federaalka ee fashilantay, waa astaan muujineysa maamul musuq maasuq ku dhisan oo ku jira rafadkii ugu dambeeyay, majirto tallaabo ay qaadi karaan oo ay ku joojin karaan aqoonsiga soo socda ee Soomaaliland” ayuu yiri wasiirka arimaha dibadda maamulka labaxay Soomaaliland.
Dowladda Maraykanka ayaa dhankeeda illaa iyo hadda si rasmi ah uga hadlin soojeedinta Xasan Sheekh Maxamuud, waxaana muuqata in warqadda ay iyagu u dusiyeen warbaahinta reer galbeedka, si loogu fadeexeeyo Xasan Sheekh Maxamuud oo wajahay xaalad cakiran, kadib weeraro ballaaran oo uu kala kulmay Xarakada Mujaahidiinta Al-Shabaab.
Masuul hore oo Ameerikaan ah ayaa qoraal uu soo dhigay baraha Intenetka, wuxuu doqon ku tilmaamay Xasan Sheekh Maxamuud, isagoo ku sheegay inuu ku gorgortamayo dhul aanu isagu maamulin.
Peter Bham oo ah ergeygii hore ee Maraykanka u qaabilsanaa Geeska Afrika ayaa wuxuu yiri “Wuxuu u maleeyaa in Maraykanku doqon yahay oo uu usoo bandhigi karo dekadaa muhiimka ah ee Soomaaliland iyo Puntland, kuwaasoo uusan xitaa gacanta ku heynin” ayuu yiri masuulkan Ameerikaanka ah oo tacliiqinaya warqadda uu Xasan Sheekh Maxamuud u diray Donald Trump.
