Waxaa maalintii shalay oo Jimco ahayd magaalada caasimadda ah ee Muqdisho gaaray, madaxweynayaasha maamul goboleedyada Galmudug, Hirshabeelle iyo Koonfurgalbeed, kuwaasoo kamid ah maamul goboleedyada siyaasad ahaan taabacsan Xasan Sheekh Maxamuud, madaxweynaha Dowladda Federaalka.
Cabdi Casiis Laftagareen, Axmed Qoorqoor iyo Cali Guudlaawe ayaa gaaray Villa Soomaaliya oo uu deganyahay Xasan Sheekh Maxamuud, waxaana ay halkaasi kula kulmeen madaxweynaha Dowladda Federaalka.
Tallaabadan ay magaalada Muqdisho ku yimaadeen madaxda maamul goboleedyada qaarkood ayaa lagu tilmaamay, iney gogol xaar u tahay gogoshii uu dhawaan sheegay inuu fidinayo Xasan Sheekh Maxamuud, laguna casuumayo madaxda iyo siyaasiyiinta mucaaradka ah.
Illaa iyo hadda waxaa mugdi ku jiraa in madaxweynayaasha maamul goboleedyada Puntland iyo Jubbaland ay kasoo qeybgeli doonaan kulanka uu Xasan Sheekhh iclaamiyay, waxaase ay u badantahay ineysan imaan doonin Muqdisho Siciid Deni iyo Axmed Madoobe, iyadoo uu horey maamulka Puntland ugu dhawaaqay inuusan Deni waqti u heynin Xasan Sheekh Maxamuud.
Axmed Madoobe ayaa isagu dhankiisa wuxuu horey usoo dhaweeyey warka kasoo yeeray Xasan Sheekh Maxamuud, waxaase uu maalintii shalay u safray dalka Kenya, halkaas oo la sheegay inuu kula kulmayo masuuliyiin katirsan Beesha Caalamka.
Xuseen Sheekh oo ah la taliyaha madaxweynaha Dowladda Federaalka Xasan Sheekh Maxamuud, ayaa isagoo ka qeybgalay barnaamij doodeed uu qabtay mid kamid ah telefeshinnada Soomaalida, wuxuu sheegay in maamul goboleedyada Puntland iyo Jubbaland ay ku casuumanyihiin shirka, waxase uu ka gaabsaday inuu si toos ah u magacaabo Axmed Madoobe iyo Siciid Deni.
