Iyadoo halkii ugu sareysay uu gaaray khilaafka adag ee ka dhex taagan Dowladda Federaalka ee uu madaxweynaha ka yahay Xasan Sheekh Maxmuud iyo maamulka labaxay Jubbaland ee Axmed Madoobe hogaamiyo, ayaa waxaa soo baxaya warar tilmaamaya in Maraykanku doonayo in la qaboojiyo xiisadda.
Ra’iisul wasaaraha Dowladda Federaalka Xamse Cabdi Barre ayaa dhawaan booqasho aan horey loo sii shaacin wuxuu ku tagay magaalada Nairoobi ee caasimadda dalka Kenya, halkaas oo uu kula kulmay madaxda dowladda Kenya ee uu hogaamiyo William Ruto, waxaana jira diblumaasiyiin Ameerikaan ah oo la kulmay Xasme.
Sida ay tilmaameyso xogta la helayo, Maraykanka ayaa doonaya in la qaboojiyo khilaafka siyaasadeed ee soo kala dhexgalay Axmed Madoobe iyo Xasan Sheekh Maxmuud, iyadoo la qaadayo tallaabooyin aaney raalli ka ahayn Dowladda Federaalka, oo ay kamid tahay in Raas-Kambooni laga soo saaro ciidankii dhawaan halkaas ay ka dejisay Dowladda Federaalka.
Dowladda Kenya oo iyaduna lagu xagliyo iney la safantahay Axmed Madoobe ayay madaxdeedu waxay Xamse Cabdi Barre ku wargeliyeen, iney muhiim tahay in xiisadda hoos loo dhigo, ciidamada la geeyay Raas-kamboonina dib loogu celiyo magaalada caasimadda ah ee Muqdisho.
Dowladda Federaalka ayaa ka caga jiideysa awaamiirta uga timid dowladda Maraykanka ee qeybta ka ah duullaanka Soomaaliya, waxaana ay raadineysaa qaabab kale oo ay uga baaqsan karto arintan, inkastoo aaney muuqan tallaab kale oo ay qaadi karto, oo aan ka ahayn fulinta amarka Maraykanka.
Maraykanka ayaa u arka maamulka labaxay Jubbaland ee uu hogaamiyo Axmed Madoobe mid muhiim u ah dagaalkiisa ka dhanka ah ku dhaqanka Shareecada Islaamka ee uu Soomaaliya kaga jiro, waxaana khilaafaadkan uu u arkaa kuwa curyaamin kara ajandayaasha duullaankiisa, sidaasi darteed ayuu ugu xusul duubayaa in lasoo afjaro.
Lama oga tallaabada xigta ee ay qaadi doonto Dowladda Federaalka, waxaana Axmed Madoobe oo bayaan soo saaray isaguna uu mudo labo todobaad ah u qabtay Dowladda Federaalka iney ciidankeeda kala baxdo Raas-Kambooni.
