Ugu yaraan 26 ruux ayaa ku shahiiday duqeymo maalintii shalay ka dhacay Marinka Qazza, kadib markii Yahuuddu gentaallo ku beegsadeen.
12 kamid ah dadkan ayaa ku shahiiday guri ku yaalla Jabaaliya oo kamid ah Qazza, halka ay jiraan tiro kale oo ay dhaawacyo soo gaareen, waxayna halkaasi Yahuuddu ka fuliyeen illaa 2 duqeyn.
Guriga ay haleeshay duqeyntan ayaa gebi ahaanba burburay, wuxuuna saameeyay guryo kale oo daris lahaa, arrintaasi ayaana mar kale sabab unoqotay iney adkaato xaaladda halkaasi ka jirta.
Sidaasi si lamid ah, 11 ruux ayaa ku shahiiday duqeyn ay bartamaha Marinka Qazza ka geysteen diyaarado Drones ah oo ay leedahay Yahuudda, kadib markii ay beegsadeen teendhooyin dadka shacabka ah halkaasi ka taagteen.
Waxaa sido kale jira dhaawacyo ka dhashay duqeymahaas oo loo qaaday isbitaalka Al-Cowdah.
Sido kale magaalada Khaan-Yuunis waxaa duqeyn ka dhacday ku shahiiday labo ruux oo rag iyo dumar ka kooban, halka haweeney kale oo Falastiiniyad ahna ay rasaas la dhaceen ciidanka Yahuudda xilli ay ku sugneyd magaalada Rafax oo katirsan Marinka go’doonsan ee Qazza.
Dhanka kale mid kamid ah Afhahayeenada kooxaha muqaawamada Falastiin ayaa lagu dilay duqeyn saakay ka dhacday Marinka.
Duqeyntan oo ay ka dambeysay Yahuudda ayaa ka dhacday xaafadda Jabaaliya, waxaana lagu dilay Cabdiladhiif Al-Qaanuuci.
