Madaxweynaha Dowladda Federaalka Xasan Sheekh Maxamuud ayaa maalintii shalay wuxuu booqasho ku tagay dalka Jabuuti, halkaas oo uu kula kulmay madaxweynaha Jabuuti Ismaaciil Cumar Geelle.
Booqashada Xasan Sheekh Maxamuud oo aan horey loo sii shaacin ayaa waxaa lagu soo waramayaa, inuu Ismaaciil Cumar Geelle kala hadlay, xaaladda dagaal ee kasoo cusboonaatay Soomaaliya, iyadoo ay dheceen dagaallo waaweyn oo lagu jebiyay ciidamada Dowladda Federaalka.
War kooban oo kasoo baxay kulanka labada dhinac ayaa lagu sheegay, in Xasan Sheekh Maxamuud uu ka mahadceliyay ka mid ahaanshaha ciidamada Jabuuti ee duullaanka Soomaaliya, halka Geelle uu sheegay iney garabtaagnaanayaan Dowladda Federaalka.
ilo wareedyo la helayo ayaa tilmaamaya in Xasan Sheekh Maxamuud uu doonayo in Ismaaciil Cumar Geelle kala hadlo Maraykanka, si ay u qaataan dekadaha iyo garoomada milliteri ee uu dhawaan soo bandhigay Xasan Sheekh, taas bedelkeedana Maraykanku dib u billaabo dhaqaalihii uu siinayay ciidamada DANAB iyo guud ahaan Dowladda Federaalka.
Xasan Sheekh Maxamuud oo ay xaaladdu ku xuntahay ayaa marba u safraya dalka dibadiisa, isagoo kasoo cararay furimaha dagaalka ee uu dhawaan tagay, sheegeyna inuu ka hogaaminayo dagaallada ka dhanka ah Xarakada Mujaahidiinta Al-Shabaab.
Dadka dhaliila siyaasadda Xasan Sheekh Maxamuud ayaa sheegay, in qarashaatka ugu badan ee qasnadda Dowladda Federaalka uu Xasan Sheekh ku bixiyay safarrada dibadda ah, kuwaasoo aaney jirin wax natiijo ah oo uu ka keeno.
