Wasiirka difaaca Yahuudda Yisrael Katz ayaa mar uu warbaahinta la hadlayay Xamaas ugu hanjabay in ay badaleen go’aankii hore ee xabad-joojinta ahaa, kaddib markii Yahuuddu ay duqeymo cirka ah ka geysatay marinka Qaza, maalinimadii Talaadada ee 18-ka Maarso, taasoo aan horay loo arag xoogeeda tan iyo markii ay dhaqan gashay xabbad joojinta bishii Janaayo ee la soo dhaafay.
War qoraal ah oo ka soo baxay wasaaradda difaaca ee Yahuudda ayaa lagu sheegay, in Katz uu hanjabaad u diray Xamaas intii uu ku guda jiray booqashadiisa Saldhigga Diyaaradaha ee Tel Nof: wuxuuna yiri “Haddii Xamaas aysan si degdeg ah u sii deyn maxaabiista Yahuudda, waxaan furi doonaa albaabada jaxiimada, waxayna Xamas wajihi doontaa awoodda ciidamadeena cirka, badda iyo dhulka, illaa aan gebi ahaanba baabi’ino awooda muqawamada.” Hase ahaatee hanjabaadaas ayaan waxba ka duwanayn tii uu ku goodin jiray Natanyahu bilowgii dagaalka, isagoo ugu damabayntii aqbalay heshiis maxabiis isdhaafsi ah 15 bilood kaddib.
Arrintan ayaa muujinaysa in Maraykanka iyo Yahuuddu ay iska kaashadeen weerarka dib loogu bilaabay dagaalka Marinka Qaza, waxaana jira tafaasiil hoose oo sheegaya, in ay Yahuuddu ku wargelisay maamulka Maraykanka duulaanka Marinka Qaza wax yar ka hor inta aan la fulin.
Ciidamada Yahuudda ayaa ku dhawaaqay, in ay dib u billaabeen dagaalkii labaad ee ay ku qaadeen marinka Qaza, kaddib markii Maamulka Yahuuddu uu Xamas ku eedeeyay fashilka wada xaajoodyada lagu sii deynayo Maxaabiista.
Maamulka Yahuudda ayaa dhankiisa si bareer ah u hakiyay dadaalladii lagu bilaabayay wareeggii Labaad ee wada xaajoodka, kaas oo lagu heshiin lahaa in ciidamada Yahuuddu ay gabi ahaanba isaga baxaan marinka Qaza, si ay Xamaasna dhankeeda u sii deyso dhammaan maxaabiista Yahuudda ah ee gacanteeda ku jira.
Sida ay sheegayaan khubarada amnigu, waxaa cadayd in Netanyahu aysan dhab ka ahayn fulinta waxyaabihii lagu heshiiyey kulankii ka dhacay Qaahira, kaas oo qabsoomay 15-kii Janaayo, isla markaana lagu gaaray xabbad joojinta labada dhinac ee maxaabiis is dhafsiga.
Natanyahu ayaa bilaabida dagaalkan cusub ka leh ujeedooyin siyaasadeed oo uu ku dajinayo fadqaladoonyinka ay wajahayso xukumadiisu, taas oo ku kaliftay inuu mar kale ku hanjabo dib u bilaabida xasuuqii uu ka gaysanayay marinka Qaza, si uu usoo furto Maxaabiista Yahuudda ah ee ku jira gacanta muqawamada Falastiiniyiinta.
Xiisadaha ka jira gudaha Yahuudda ayaa caqab ku ah Netanyahu, oo ay ugu horeyso go’aanka maxkamada racfaanka ee Sahaayinda, taasoo ogolaatay codsigii Netanyahu ee ahaa in dib loo dhigo dacwadiisa, kaddib bilaabashada dagaalka marinka Qaza.
