Maxamuud Cali Yuusuf oo ah Gudoomiyaha ururka Midowga Afrika oo maalintii shalay booqasho aan horey loo sii shaacin ku yimid magaalada Muqdisho, ayaa sheegay in weli ay jiraan caqabado ku horgudban duullaanka Shisheeyaha ee Soomaaliya, kaasoo dhawaan qaatay magac cusub oo ah AUSSOM.
Wuxuu sheegay iney jecelyihiin sii wadista taageerada Dowladda Federaalka, laakiin ay jiraan caqabado iyo taxadiyaad waaweyn oo ku horgudban, oo ay ugu weyntahay dhibaato dhaqaale iyo mid Lojistik.
Wuxuu sheegay iney rajeynayaan in si rasmi ah ay u shaqo billaabaan ciidamada Shisheeyaha ee AUSSOM bisha July, laakiin aaney heysanin weli maalgelin iyo Lojistikada ay ciidamadu u baahanyihiin.
Duullaanka magaca loo bedeley ee AUSSOM ayaa noqday mid fadhiid ah, waxaana ciidamada Shisheeyaha howshooda lagu sheegay keliya iney noqoto taageerada xasiloonida, taasoo ka dhigan inaaney ka barbar dagaallami doonin ciidamada Dowladda Federaalka.
