Kadib doorasho natiijadeeda lasii saadaalinayay oo maanta ka dhacday magaalada Kismaayo ee xarunta gobalka Jubada-hoose, ayaa waxaa isku doortay Axmed Madoobe oo mar 3-aad noqday hogaamiyaha maamulka la baxay Jubbaland.
Mudadii ay doorashadu socotay, waxaa tanaasulay qaar kamid ah musharixiintii la tartameysay Axmed Madoobe, oo la sheegay in badannkood ay ahaayeen kuwa uu isagu keensaday.
Ilyaas Badal Gaboose oo kamid ahaa musharrixiintii la tartameysay Axmed Madoobe ayaa isku dhiibay maamulka la baxay Jubbaland, isagoona ka laabtay go’aankiisa ahaa inuu yahay madaxweynaha cusub ee maamulkaas.
Horay ciidamada Boliska ee maamulka la baxay Jubbaland ayaa weerar ku qaaday, Hotel uu ku sugnaa Ilyaas oo ku yaalla magaalada Kismaayo, waxaana weerarkaasi ka dhashay khasaare isugu jira dhimasho iyo dhaawac.
Ninkaan oo kamid ah baarlamaanka Dowladda Fedaraalka ayaa lasoo warinayaa in la geeyay Hotel ku yaalla magaalada Kismaayo, halkaas oo lagu wado inuu kula kulmo Axmed Madoobaha dib isku doortay.
Dowladda Fedaraalka oo kasoo horjeeday doorashooyinka uu qabanayo Axmed Madoobe ayaa ku fashilantay dhiciseynta qorshaha hogaamiyaha maamulka la baxay Jubbaland, Ilyaas Gaboose oo kamid ah xubinihii ay iyadu soo dirtay ayaana isku dhiibay maamulkii uu kasoo horjeeday.
