Warbixin ay dhawaan soo saareen gole qaabilsan cudurka Kansarka oo ka hawgalo dalka Ciraaq ayaa lagu sheegay, in inka badan 43 kun oo kiis oo cusub oo kansar ah la diiwaangeliyay dalkaas 2024-kii, taasoo ka tarjumaysa kor u kac walaac leh oo u baahan jawaab deg-deg ah.
Kansarka naasaha ayaana ah nooca ugu faafitaanka badan, kaas oo boqolkiiba 36% ka ah wadarta kiisaska la diiwaangeliyay. Iyadoo kororkan loo aaneynayo arrimo la xiriira bii’ada iyo caafimaadka, oo ay ugu badan tahay wasakhowga deegaanka ee ay sababaan haraadiga dagaallada.
Umm Muhammad, oo uu asiibay cudurkan lana hadashay warbaahinta ayaa ka warantay waayo-aragnimadeeda murugada lahayd ee ay kala kulantay isbitaal ku yaalla caasimadda Baqdaad, waxay tiri, “Waxaan filayay inaan helo daryeel aad u fiican, laakiin waxaan la yaabay dayaca, shaqaale yarida iyo qalabka la’aanta ka jirta isbitaalka, xitaa markii aan weydiistay in la icaawiyo wax jawaab ah ma helin, isbitaalka ayaana ahaa mid ciriiri ah, xaaladda nafsi iyo midda caafimaad ee bukaannadana waxay ahayd mid aad u xun”.
Haweeneydan ayaa intaa ku dartay, in dadka la siinayo dawada Kansarka ay u baahan yihiin inay ku qubaystaan ugu yaraan saddex jeer, balse nadaafad darrada iyo biyo kulul la’aanta ka jirta isbitaalka awgeed, ay ku khasbanaatay inay gurigeeda ku laabato, inkastoo ay u baahnayd inay joogto isbitaalka si ay u dhammeeysato dawada, laakiinse way u adkeysan waaysay nadafad darradiisa.
Mid kamida agaasimayaasha isbitaallada Ciraaq, oo doorbiday in aan magaciisa la shaacinin, ayaa u sheegay Al-Araby Al-Jadiid, in isbitaallada uu gabaabsi ka yahay qalabkii caafimaadka, gaar ahaan kuwa loogu talo galay daweynta iyo ogaanshaha kansarka.
Audio Player