Jeneraal Gafeydhe oo kamid ah saraakiisha Liyu Booliiska Dowladda Xabashida Itoobiya u shaqeeya, ayaa waxa uu dad shacab ah markale ku xirxiray deegaan katirsan dhulka Soomaali-galbeed ee ku hoos jira gumeysiga Itoobiya.
Dad isku qoys ah ayay maleeshiyaad uu watay sarkaalkaan u shaqeeya Xabashida Itoobiya waxa ay ku xireen degmada Wajaale, iyagoo usii gudbiyay xabsiyo qarsoon oo ay ku leeyihiin magaalada Jigjiga.
Wiil dhalinyaro ah oo lagu magacaabo Guuleed Cabdi goor sii horreysayna ka yimid qurbaha, iyo 2 gabdhood oo uu midi adeer u yahay tan kalana ay xigto yihiin ayay xabsiga dhigeen maleeshiyaadka Liyu Bolis.
Markii ay wareysteen wiilka dhalinyarada ah ayay weydiiyeen haddii ay jiraan dad kale oo u dagan magaalada Jigjiga, intaas kadibna waxay ku baadi goobeen wixii ka haray ehelkiisa, iyagoona u tagay haweeney nuujineysay ilmo yar oo la nool cudurka macaanka ama sonkorta, waxaana ay halkaasi kasoo qafaasheen haweeneydaas, 2 ruux oo kale iyo ilmihii yaraa ee ay wadatay.
In muddo ah oo ay heysteen kadib ayay sii daayeen wiilka dhalinyarada ah, ka gadaal markii ay ku waayeen eedeyntii ay u jeediyeen oo aheyd inuu qeyb ka ahaa dadkii ka qeyb qaatay dagaalladii maleeshiyaadkaas lagula galay deegaanka Dacawaley ee dhulka Soomaali-galbeed.
Jeneraal Gafeydhe ayaa waxaa wali xabsiga ugu jira 3-dii hablood ee ay midi nuujineysay ilmaha yar, taas oo illaa iyo hadda aan la ogeyn halka ay ku xireen.
Ehelka gabadha ayaa baadi goob u galay qaabkii ay usoo ogaan lahaayeen halka ay ku xiran tahay gabadhooda, si ay ugu geeyaan dawada cudurka ay la nooshahay, balse ma aysan helin wax xog ah oo ku aaddan halka ay ku xiran tahay.
Dhibaatadaani ayaan ku ekeyn halkaan qoys, balse waxaa lasoo warinayaa in sarkaalkaan katirsan maleeshiyaadka Liyu Bolis uu dhowr iyo toban ruux sidaan oo kale xabsiga ugu taxaabay, isagoona ku xiray jeelal qarsoodi ah halkaasna ugu geysanayaan tacdiib iyo dhibaatooyin kale.
