Warbixin dhawaan ay soo saartay dowladda Mareykanka ayaa daaha ka qaaday, tafaasiil yaab leh oo ku saabsan dhaq-dhaqaaqyada kooxaha ka ganacsada daroogada ee Mexico, kuwaas oo dhaqdhaqaaqyo cusub ka samaystay dalka Kenya.
Arrinka ugu muhiimsan ee warbixintan ayaa ah muujinta shaybaarka lagu farsameeyo maandooriyaha loo Yaqaano methamphetamine ee ay maamulaan kooxda caanka ah ee Mexican cartel oo loosoo gaabiyo CJNG.
Daah-furka warbixintan ayaa muujinaysa doorka Kenya ay ku leedahay isku xirka istaraatiijiyadeed ee shabakadaha ka ganacsada daroogada caalamiga ah, kuwaas oo laamo cusub ka furtay gudaha dalka Kenya, ayagoo soo saara daroogo xad dhaaf ah oo loo iibgeeyo wadamada caalamka.
Sida lagu sheegay warbixinta aan soo sheegnay ee ay soo saartay dowladda Mareykanka, shirkadda Jalisco Cartel ayaa billowday in ay Kenya u isticmaasho xarun soo saarta maandooriyaha methamphetamine, taas oo hirgalinteeda ay bilaabatay horraanta sannadkii hore ee 2024-ka.
In kasta oo kooxdan reer Mexico ee ka ganacsata mandoriyaha ay caan ku ahaayeen fulinta falal dambiyeedyo ka dhaca Waqooyiga Ameerika, haddana falanqeyntan ayaa daaha ka qaaday heerka ay kooxahan ku leeyihiin dambiyada kasoo cusboonaaday qaar kamida wamada Afrika.
Weeraro ay Sirdoonka Kenya ku qaadeen shaybaaro ku yaalla waqooyiga dalka Kenya ayaa lagu ogaaday, in halkaas lagu farsameeyo boqollaal kiilo oo daroogo ah oo macmal ah, taas oo argagax galisay bulshada gudaha iyo tan caalamka.
Wararku waxay daaha ka qaadayaan in shaybaaradan ay maamulaan burcad kasoo jeeda dalka Mexico, waxaana goobahan ku rakiban qalabyo casri ah oo lagu farsameeyo daroogada methamphetamine, kooxdan ayaa maandooriyaha ay farsamayso ku gudbisa shabakado qarsoodi ah oo qaarkood ku sugan dalka Maraykanka.
Waxay sidoo kale wararku sheegayaan in hawlahani aanay ku koobnayn Kenya oo keliya, balse ay qayb ka yihiin qorshe istiraatijiyadeed oo lagu kordhinayo wax-soo-saarka daroogada Afrika, taas oo suuq caalamiya ka helaysa ka ganacsiga daroogada aduunka.
