Madaxweynaha Mareykanka Donald Trump ayaa Arbacadii saxiixay amar uu lacago canshuuro ah ugu soo rogaya badeecadaha laga keeno wadamada adduunka, talaabadan ayaa waxaa cambaareeyey labada dhinac ee Washington la shaqeeya iyo kuwa ka soo horjeeda, waxaana soo baxay digniino ku saabsan khatarta weyn ee ay ku yeelan karto dhaqaalaha adduunka.
Trump ayaa ku soo rogay canshuur dhan boqolkiiba 34 badeecadaha laga keeno Shiinaha iyo 20 boqolkiiba badeecadaha laga keeno Midowga Yurub, oo ah labada ganacsi ee ugu waaweyn ee shurakada la ah Mareykanka.
Waxa uu intaa ku daray Trump, in cashuur kastamkeeda ugu yar uu yahay boqolkiiba 10 lagu soo rogi doono dhammaan dalalka kale, marka laga reebo qaar kamida dowlaha soo socda, kuwaas laga qaadi doono cashuuro culus, sida Switzerland oo lagu soo rogayo boqolkiiba 31, Japan oo laga qaadi doona boqolkiiba 24, iyo boqolkiiba 26 oo lagu soo rogay dalka Hindiya.
Hadaba waxaan warbixintani kusoo gudbinaynaa falcelinada bilowga ah ee ugu caansan, taas oo dowlada dhawr ah ay ka bixiyeen lacagaha canshuurta ah ee uu Trump ku soo rogay badeecadaha laga soo dejiyo waddamada adduunka, gaar ahaan Shiinaha iyo Midowga Yurub.
Kanada
Ra’iisul wasaaraha Kanada Mark Carney ayaa ballan qaaday inuu ka jawaabi doono canshuuraha Trump, isagoo sheegay, inay canshuurahani aas-aas ahaan wax ka bedeli doonaan ganacsiga caalamiga ah.
“Waxaan uga hortagaynaa canshuurtan tallaabooyin liddi ku ah,” ayuu yiri Ra’iisul wasaaraha Kanada, isagoo xusay, in lacagaha canshuurta ah ee lagu soo rogay birta, aluminiumka iyo baabuurta ay si toos ah u saameyn doonto malaayiin Kanadiyaan ah.
Jarmalka
Warshadaha kiimikada ee Jarmalka ee u arka inuu Mareykanku yahay midka ugu wayn ee ay u dhoofiyaan wax soo saarkooda, ayaa ugu baaqay Midowga Yurub inay xaaladda dejiyaan, si ay uga jawaabaan lacagaha canshuuraha ah ee Trump, iyagoo carabka ku adkeeyay, in middi middi ku taagga ay dhibaatada uga sii daraysa.
Ururka wershadaha kiimikada ee Jarmalka ee loo soo gaabiyo (VIC), kaas oo ay ku jiraan labo shirkadood oo waawayn oo lagu kala magacaabo Bayer iyo BASF, ayaa yiri: “Waan ka xunahay go’aanka dowladda Mareykanka, hadda waa muhiim dhammaan dhinacyada ku lugta leh inay isdejiyaan.
Sidoo kale, ururka warshadaha baabuurta ee Jarmalka ee isna loo soo gaabiyo (VDA) ayaa cambaareeyay canshuurahan, iyaga oo ugu baaqay Midowga Yurub, in ay si adag uga jawaabaan, iyagoo carrabka ku dhuftay, inay arintani keeni doonto khasaare weyn. Waxayna reer Yurub ku boorriyeen, inay sii wadaan muujinta rabitaankooda ah inay gorgortan ka galaan.
Ururka shaqaalaha ayaa sidoo kale ka digay in khasaaraha uusan ku koobnaan doonin Jarmalka, balse uu sidoo kale saameyn doono macaamiisha Mareykanka iyo warshadaha gawaarida ee Mareykanka laftooda.
Geesta kale, Midowga Yurub ayaa ugu baaqay Brussels inay soo gabagabeyso heshiisyada ganacsiga ee xorta ah, oo lala yeesho gobollo badan oo adduunka ah intii suurtagal ah, si Midowga Yurub uu u noqdo horyaal ganacsi oo xor ah dhanka kalana caalami ah.
Talyaaniga
Ra’iisul wasaaraha Talyaaniga haweenayda lagu magacaabo Giorgia Meloni ayaa ku dhawaaqday, in canshuuraha uu soo rogay Trump ay tahay tallaabo xun oo uu qaaday, iyadoo ka digtay in dagaalka ganacsiga uu wiiqi doono oo kaliya reer galbeedka.
Haweenaydan ayaa war qoraal ah oo ay soo saartay ku tiri, “Cashuuraha uu Maraykanku ku soo rogay Midowga Yurub waa tallaabo aan u arko khalad oo aysan dani ugu jirin labada dhinac, waxaanu ku dedaali doonaa in aanu heshiis la galno Maraykanka si aan uga fogaano dagaal ganacsi oo si lama filaan ah u wiiqi doona reer galbeedka”.
Ingriiska
Xoghayaha Ganacsiga ee Ingriiska Jonathan Reynolds ayaa ku dhawaaqay, in Boqortooyadiisu ay weli ka go’an tahay inay heshiis la gasho dawladda Mareykanka si loo yareeyo saameynta canshuuraha cusub ee uu Mareykanka kusoo rogay, isagoo carabka ku adkeeyay in London aysan dooneynin inay qaado tillaabooyin aargoosi oo degdeg ah.
Dhankeeda, kooxda u ololaysa wax soo saarka ee Make UK ayaa cambaaraysay go’aanka Trump, iyaga oo bayaan ay soo saareen ku sheegay, in canshuurahaas aysan aqbali doonin, taas oo keenaysa inay burburto iskaashi ganacsi oo socday tobanaan sano oo isku xiri jiray ganacsiga Ingriiska iyo Maraykanka.
Ganacsata Soosaarta Baabuurta iyo kuwa Boqortooyada Ingiriiska ayaa sidoo kale cambaareeyay go’aanka Trump, iyaga oo ku tilmaamay tallaabo niyad jab ku ah ganacsigooda oo aan suuragal ahayn.
Brazil
Baarlamaanka dalka Brazil ayaa meel mariyay sharci u fasaxaya dowladda, in ay qaado tallaabo ay kaga jawaabayso xayiraad kasta oo ganacsi oo caqabad ku ah wax dhoofinta dalkaas. Dowladda uu hogaamiyo madaxweynaha Lula da Silva ayaa sheegtay, in ay ka xun tahay go’aanka ay maanta qaadatay dowladda Mareykanka ee ah in canshuur dheeri ah oo boqolkiiba 10 ah lagu soo rogo dhammaan badeecadaha ay Brazil u dhoofiso Maraykanka.
Waxay intaas ku dartay inay qiimeynayso dhammaan tallaabooyinka suurtagalka ah si loo hubiyo is-dhaafsiga ganacsiga laba-geesoodka ah ee ay ku jirto adeegsiga Ururka Ganacsiga Adduunka, taas oo la filayo inuu wax kabadalo hanaanka ay haatan wax u socdaan.
Australia
Ra’iisul wasaaraha Australia, Anthony Albanese ayaa isna dhankiisa shaaca ka qaaday in canshuuraha Trump ay yihiin kuwo gabi ahaanba aan qiil loo hayn ayna wax ka bedeli doonaan xiriirka dalkiisa uu la leeyahay Mareykanka.
Kaddib markii Trump uu ku soo rogay canshuuro heerar kala duwan ah dhammaan la hawlgalayaasha ganacsi ee dalkiisa, ayna ku jirto Australia oo uu ku soo rogay canshuur dhan boqolkiiba 10, ayuu Albanese wuxuu yiri, ” Canshuurahan waa kuwo lama filaan ah oo gabi ahaanba ah kuwo aan xaq ahayn.” Wuxuu carrabka ku adkeeyay in canshuurahaas ay cawaaqib xumo daran ku yeelan doonaan xiriirka uu dalkiisu la leeyahay Maraykanka.
Ireland
Ra’iisul wasaaraha Ireland, Micheal Martin ayaa isna muujiyay sida uu uga xun yahay canshuurta gaaraysa boqolkiiba 20 ee uu madaxweynaha Mareykanka Donald Trump ku soo rogay badeecadaha dalkiisu uu iibgeedo Maraykanka, isagoo ugu baaqay 27-ka dowladood ee xubnaha ka ah midowga Yurub inay si wadajir ah uga jawaabaan amarada dheeriga ah ee kasoo baxaya Washington.
Colombia
Madaxweynaha Colombia, Gustavo Petro ayaa sheegay, in dowladda Maraykanku ay aaminsan tahay kordhinta canshuuraha badeecadaha laga soo dejiyo guud ahaan dalkeeda ay kor u qaadi doonto wax soo saarka dhaqaale ee Maraykanka. Wuxuuna madaxwaynahani sheegay in fikradaasi ay tahay mid aan macquul ahayn oo khaldan.
Denmark
Wasiirka arrimaha dibadda Denmark, Lars Løkke Rasmussen ayaa isna dhankiisa yiri, “Qof walba ayaa ka faa’iidaysan kara ganacsiga caalamiga ah ee aduunka, ma fahmin sababta Maraykanku u doonayo in uu bilaabo dagaal ganacsi oo ka dhan ah dawladaha Yurub” wuxuu sidoo kale ku tilmaamay in dawladaha Yurub ay arrintan u midoobi doonaan jawaabna ka bixin doonaan.
Switzerland
Madaxweynaha Switzerland, Karen Keller-Sutter oo kamida dalalka lagusoo rogay canshuuraha Maraykanka, taas oo gaaraysa boqolkiiba 31, ayaa dhankeeda waxa ay ku nuuxnuuxsatay in danta dhaqaale ee dalkaasi ay tahay mudnaanta koowad ee mustaqbalka fog.
Waxay sidoo kale xustay in sharciyada ganacsiga ee caalamiga ah ay lagama maarmaan tahay inay ilaaliyaan xuquuqda wax dhoofinta ee dalalka, waxayna sheegtay in dalkaasi uu si dhakhso ah u go’aamin doono mustaqbalkiisa ganacsi.
Shiinaha
Shiinaha ayaa isna sheegay, in ay si adag uga soo horjeedaan canshuuraha cusub ee uu Mareykanku ku soo rogay wax yaabaha ay u dhoofiyaan dalkaas, isagoo ballan qaaday inay qaadi doonaan tallaabo liddi ku ah, si ay u ilaaliyaan xuquuqdooda iyo danahooda dhaqaale.
Wasaaradda ganacsiga ee magaalada Beijing ayaa bayaan ay soo saartay ku sheegtay, in canshuuraha Mareykanku aanay u hoggaansamin shuruucda ganacsiga caalamiga ah ayna si weyn u dhaawaceyso ganacsiga xorta ah.
Japan
Japan ayaa dhankeeda ka digtay in canshuuraha cusub ee uu kusoo rogay Trump ay jabin karaan shuruucda Ururka Ganacsiga Adduunka iyo heshiisyada ganacsi ee u dhaxeeya labada dal.
Wasiirka Ganacsiga iyo warshadaha ee dawladda Japan, Yuji Muto ayaa ku dhawaaqay in Tokyo ay ku wargalisay Washington in canshuuraha dheeraadka ah ee lagusoo rogay ay yihiin kuwo aad looga xumaado.
Thailand
Ra’iisul wasaaraha Thailand, Paithongtarn Shinawatra ayaa shaaca ka qaaday in dalkiisu uu leeyahay qorshe xooggan oo uu ku wajahayo canshuuraha uu Trump kusoo rogay waxyaabaha ay u dhoofiyaan Mareykanka, isagoo carabka ku adkeeyay in Bangkok ay rajeynayso, inay ku guuleysato wadahadalada lagu dhimayo canshuurta uu Maraykanku kusoo rogay ee garaysa boqolkiiba 36, taas oo uu wasiirku sheegay inay tahay canshuur xad-dhaaf ah.
Kuuriyada Koonfureed
Ku-simaha Madaxweynaha Kuuriyada Koonfureed, Han Duck-soo ayaa muujiyay sida uu uga xun yahay in dagaalka canshuuraha ee caalamiga ahi uu u noqday mid dhab ah, isaga oo ballan-qaaday inuu isticmaali doono dhammaan ilaha dawladda si looga gudbo dhibaatada ganacsi ee dalkiisa soo food-saartay.
