Qoraal ay si wada jir ah u daabaceen qoraayaal reer galbeed ah oo lagu kala magacaabo Jonthan Sweet iyo Mark Toth, laguna daabacay mowqic lagu magacaabo The Hill, ayaa waxaa ciwaan looga dhigay “ Dowladda Federaalka oo Cagta la marinayo” waxaana ay kaga hadleen xaaladda dagaal iyo culeesyada ay wajaheyso Dowladda Federaalka.
“ Filimkan waxaan horey ugu daawaannay Afqaanistaan waxaana jilyay Taliban, maantase dhameystirkiisa oo saameyn burburineed leh ayaanu ku aragnaa Soomaaliya” ayaa lagu billaabay warbixintan dardaar warinta ah ee ay qoreen qoraayaal reer galbeed ah.
Al-Shabaab oo ah koox Jihaadi Salafi ah ayaa si dhaqsi leh, waxay go’doon u gelineysaa magaalada Muqdisho ee caasimadda Soomaaliya, milliteriga kooxda ayaa la wareegaya magaalooyin katirsan gobollada Shabeellaha Dhexe iyo Shabeellaha Hoose, oo furayaal u ah magaalada caasimadda ah ee Muqdisho, ayaa lagu yiri warbixinta.
Warbixinta oo sii socota waxaa lagu yiri “ Gu’yaal badan waxay midowga Afrika iyo dowladda Maraykanka ka shaqeynayeen sidii Dowladda Federaalka ay cagaheeda isugu taagi lahayd, laakiin xilligan wuxuu waqtigu u muuqdaa mid sii dhamaanaya, Al-Shabaab ayaa sameynaya cadaadis xoogan, oo ay ku doonayaan iney kula wareegaan magaalada Muqdisho, kuna dhisaan maamul Sunni ah oo ka hana qaada bariga Afrika”.
Matt Bryaden oo ah falanqeeye ka faallooda arimaha bariga Afrika, kana tirsan xarunta dirsaatka amniga ee Sahan, ayaa aaminsan in ciidamada Dowladda Federaalka ay ku jiraan xaalad dib u furasho oo fowdo ah, dadka ku sugan magaalada caasimadda ah ee Muqdishana ay mar weliba filanayaan in nidaamka maamul ee magaalada uu isbedel ku yimaado, iyadoo ay jirto fursad ay heysato Al-Shabaab oo ay ku go’doomin karto magaalada Muqdisho, ugu dambeynna gudaha usoo geli karta.
Mid kamid ah arimaha sii xoojinaya cabsida laga qabo in Muqdisho ay gudaha usoo galaan Al-Shabaab, waa qarixii xooganaa ee 18 Marso Muqdisho lagula eegtay kolonyo uu la socday madaxweynaha Dowladda Federaalka Xasan Sheekh, sida lagu sheegay warbixinta lagu daabacay mowqica The Hill ee ka faallooda arimaha amniga.
Sida ay tilmaamayaan qoraayaasha reer galbeedka ee warbixintan qoray, in Xarakada Mujaahidiinta Al-Shabaab ay rido Dowladda Federaalka, waxay ka dhignaan doontaa jamaaco labaad oo sunni ah, oo awood u yeelatay iney cagta mariso dowlad uu Maraykanku taageero, Al-Shabaabna waxay meel ay cagta dhigaan ka heli doonaan geeska Afrika.
Ma ahan warbixintii ugu horeysay oo ku saabsan xaaladda Soomaaliya, taasoo lagu muujiyay cabsida xoogan ee la xiriirta in isbedel xoogan oo xaga maamulka ah ka dhaco Soomaaliya, Dowladda Federaalka ee ku tiirsan taageerada reer galbeedka iyo midowga Afrikana cagta la mariyo.
Dhawaan ayaa khabiir ka faallooda arimaha geeska Afrika, masuulna ka ah machadka Afrika ee diraasaatka, wuxuu sheegay in Xarakada Mujaahidiinta Al-Shabaab ay kulaaleyso magaalada caasimadda ah ee Muqdisho, iyadodo lasoo baxday xeelado milliteri oo halis ah.
