Wadahadallo u dhaxeeyay Mareykanka iyo Ruushka ayaa Isniintii ka billowday Sacuudiga, si ay uga wada hadlaan suurtagalnimada, in xabbad-joojin dhinac ah laga gaaro dagaalka saddex sano jirsaday ee ka holcaya dalka Ukraine, iyadoo Ruushka iyo Ukraine ay Isniintii is weydaarsadeen weerarro dhulka ah iyo eedeymo siyaasadaysan.
Kooxa matalayay Maraykanka iyo Ruushka ayaa kulan albaabadu u xiranaayeen ku yeeshay hotel ku yaalla magaalada Riyadh, halkaas oo laga soo saaray suurtagalnimada in dib loo soo nooleeyo heshiiskii Badda Madow ee 2022-kii.
“Hadda waxaan sugeynaa natiijada kasoo baxda kulanka Mareykanka iyo Ruushka,” ayuu yiri sarkaal magaciisa qariyay oo ka tirsan wafdiga Ukraine, kaas oo la hadlay dhowr warbaahin. Isagoo rajeeyay, in uu kulan kale la yeesho Maraykanka.
Wada-xaajoodayaasha ka socday Maraykanka ayaa ka shaqaynayay hindise ah, in xabbad-joojin dhinac ah laga hirgaliyo Ukraine, iyagoo la kulmay wakiillo ka socday Ruushka oo ku suganaa Sacuudi Carabiya, maalin kadib markii ay wadahadallo gooni gooni ah la yeesheen fariiqa ka socday Ukraine.
Kyiv iyo Moscow ayaa ku heshiiyey xabbad joojin xaddidan, kadib markii madaxweynaha Mareykanka Donald Trump uu la hadlay hoggaamiyeyaasha labada dal, laakiin labada dhinac ayaa soo bandhigay aragtiyo kala duwan oo ku aaddan waxa bartilmaameedyada ay tahay in laga mamnuuco.
Inkasta oo Aqalka Cad uu sheegay, in tamarta iyo kaabayaasha lagu dari doono heshiiska, balse Kremlin-ka ayaa ku dhawaaqday, in heshiiska si uu mugdi ku jira u tixraacayo kaabayaasha tamarta, halka madaxweynaha Ukraine Volodymyr Zelensky uu muujiyay rabitaankiisa ah in weerarrada laga ilaaliyo jidadka tareenada iyo dekedaha.
Wadahadalada shalay ka furmay Sacuudiga ayaa la filayaa, in looga hadlay qaar ka mid ah is afgaran waagaas, iyo sidoo kale suurtagalnimada in la hakiyo weerarada Badda Madow si loo sugo badqabka maraakiibta ganacsiga ee mara halkaas.
Wakaladda wararka Ruushka ee TASS ayaa sheegtay, in wakiilo ka kala socday Mareykanka iyo Ruushka ay shalay ku kulmeen magaalada Riyaad ee caasimadda Sacuudiga. Kulankaas ayaana waxaa ka horeeyay kulan Axaddii kooxaha ka socday dowladaha Mareykanka iyo Ukraine ay ku yeesheen magaalada Riyadh.
