Xasan Cali Kheyre, ra’iisul wasaarihii hore ee Dowladda Federaalka ayaa sheegay iney damqisay la wareegitaanka ciidamada Xarakada Mujaahidiinta Al-Shabaab ee magaalada Masaajid Cali Gaduud ee gobolka Shabeellaha Dhexe, halkaas oo maalintii shalay ka dhacay dagaal culus.
Qoraal uu soo dhibay barta uu Facebook-ga ku leeyahay, ayuu Xasna Cali Kheyre ku sheegay inuu aad uga damqaday waxa ka dhacay Masaajid Cali Gaduud, oo uu sheegay in labo sano kadib ay dib ula wareegeen argagaxisada oo uu ula jeedo ciidamada Xarakada Mujaahidiinta Al-Shabaab.
“Waxaa i damqisay in argagaxisadu ay maanta dib u qabsadeen deegaanka Masaajid Cali Gaduud oo ay Ciidamada Qalabka-sida ka xoreeyeen 2 sano ka hor, ayna nooga baxeen halyeeyo qaran oo naftooda qaaliga ah u huray xoreynta dadkooda iyo dalkooda” ayuu ku yiri qoraalka uu soo dhibay barta Facebook, ra’iisul wasaarihii hore ee Dowladda Federaalka Xasan Cali Kheyre.
Xasan Sheekh Maxamuud madaxweynaha Dowladda Federaalka ayuu ugu baaqay Xasan Cali Kheyre, inuu qaato kaalin hogaamineed, kana fogaado waxyaabaha u keeney fashilka, gogolna u dhigo siyaasiyiinta kasoo horjeeda ee ay waaya hore kala irdhoobeen.
Hadal heynta la xiriirta dagaalkii cuslaa ee Masaajid Cali Gaduud iyo la wareegitaanka ciidamada Xarakada Mujaahidiinta Al-Shabaab, ayaa tan iyo shalay waxay ka taagantahay baraha bulshada, iyadoo masuuliyiinta Dowladda Federaalka, siyaasiyiin, mucaarad iyo taageeriyaasha Dowladda Federaalka ay dhexdooda is aflagaadeynayeen, mid welibana kan kale dusha kaga tuurayo masuuliyadda fashilka ku habsaday.
