Madaxweynaha Dowladda Fedaraalka Xasan Sheekh ayaa kadib fashilkii uu kala soo kulmay furimaha dagaalka waxa uu billaabay inuu marba dal uduulo, si uu uweydiisto kaalmo iyo iney kala qeyb galaan dagaalka ka dhanka ah Xarakada Mujaahidiinta Al-Shabaab.
Xasan ayaa maanta u duulay dalka Uganda, isagoona ka dagay magaalada Kampala ee caasimadda dalkaas, waxaana xogaha la helayo ay sheegayaan inuu madaxda dalkaasi kala hadlayo xaaladaha amni ee heysta Dowladdiisa, si gaar ah qalqalka ay wajahayaan oo ah in magaalada Muqdisho ay la wareegto Xarakada Mujaahidiinta Al-Shabaab.
Safarka Xasan Sheekh oo aan horay loo sii shaacin ayaa waxa uu qorshuhu yahay inuu la kulmo Baadariga maamulo dalka Uganda ninka lagu magacaabo Yuweeri Musavani, si uu weydiisto kaalmo millatari.
Si lamid ah bahdilaaddii loogu sameeyay dalalka Turkiga iyo Jabuuti, waxaa Xasan garoonka magaalada Kampala ku qaabilay xubno katirsan Dowladda Uganda, iyadoo uusan garoonka kusoo dhaweyn Yuweeri Musavani.
Horay Baadariga maamula dalka Uganda ee Yuweeri Musavani, ayaa waxa uu Xasan Sheekh ku wargaliyay in haddii uu kaalmo doonayo uu ka darwarsado dowladaha Imaaraatka, Qadar, Turkiga iyo kuwa kale ee duullaanka ku jooga Soomaaliya, isaguna uusan waxba utari karin.
Madaxweynaha Dowladda Fedaraalka ayaa safarradii kan ka horreeyay ee uu ku tagay Turkiga iyo Jabuuti kala soo noqday waji-gabax iyo faro-marnaan, waxa uuna la kulmay wax ka duwan wixii uu filayay oo aheyd in uu helo taageero dheeraad ah.
Tani ayaa kusoo aadeysa iyadoo uu sii xoogeysanayo walaaca heysta madaxda iyo xubnaha u shaqeeya Dowladda Fedaraalka, sidoo kalana ay isa soo tarayaan warbixinnada sheegaya in Xarakada Mujaahidiinta Al-Shabaab ay isku diyaarineyso la wareegitaanka Magaalada Muqdisho.
